Beggja blands að vera í fremstu víglínu

Hinn ástsæli lagahöfundur Magnús Þór Sigmundsson heldur útgáfutónleika í Salnum í Kópavogi í kvöld í tilefni af útkomu plötunnar Hljóð er nóttin. Magnús Þór Sigmundsson hefur unnið sér sess sem einn ástsælasti lagahöfundur þjóðarinnar og samið lög sem greipt hafa sig inn í hug og hjörtu jafnt eldri sem yngri kynslóða Íslendinga.

Á meðal þeirra eru Ísland er land þitt, Ást, Jörðin sem ég ann og Blue Jean Queen. Hljóð er nóttin er fyrsta eiginlega sólóplata Magnúsar Þórs í tuttugu ár. Hann segist ekki hafa haft neinn sérstakan áhuga á því fyrr en núna að stíga á nýjan leik fram í sviðsljósið. "Mér líður betur að semja á bak við tjöldin. Ég gerði töluvert af því að spila út um allt á sínum tíma en fannst það ekkert gaman," segir Magnús Þór.

"Ég var með plötu með nýju efni sem mig langaði að gera en síðan kom Steinar (Berg Ísleifsson) með hugmynd um að nálgast eldri lög sem aðrir hafa flutt og ég hef líka sungið og gefa þau út á plötu. Eftir að hafa velt því fyrir mér í dálítinn tíma ákvað ég að slá til," segir hann. Tvö af nýju lögunum voru sett á nýju plötuna. Þau eru titillagið Hljóð er nóttin, sem er fyrsta lag plötunnar, og Ólýsanleg, sem er það síðasta. Aðspurður hvort Magnús ætli næst að ljúka við plötuna sem hann var byrjaður á segir hann ekkert ákveðið í þeim efnum.

"Ég er alltaf að búa til eitt og eitt lag. Það er að skapast stemmning í mér að fara að flytja sjálfur mitt efni. Það er samt beggja blands að vera í fremstu víglínu. Mér finnst það meira fyrir ungt fólk. Það er miklu meiri skemmtistemmning á þessum stöðum og ég er eiginlega meira hinum megin," segir Magnús.

Á útgáfutónleikunum í kvöld mun Magnús Þór flytja lögin sín og jafnframt segja frá tilurð hvers lags fyrir sig. Jón Ólafsson aðstoðar hann við þessa upprifjun með innskotum og spurningum. Aðalatriðið verður þó flutningur allra laganna á plötunni auk þess sem einvala lið hljóðfæraleikara kemur fram.

Auk Magnúsar Þórs, sem syngur og leikur á kassagítar, og Jóns Ólafssonar, sem leikur á hljómborð og raddar, koma fram þeir Stefán Magnússon, rafgítar, Róbert Þórhallsson, kontrabassi og Birgir Baldursson, slagverk. Tónleikarnir hefjast klukkan 20.00 og er miðaverð 2000 krónur. Miðasala fer fram á salurinn.is og í síma 5700400.