Samherji styrkir Stöðvarfjörð

Samherji hefur ákveðið að leggja tuttugu milljónir í uppbyggingu smærri fyrirtækja á Stöðvarfirði. Fyrsta september næstkomandi munu 32 Stöðfirðingar missa vinnu sína hjá Samherja þegar fyrirtækið lokar frystihúsi sínu á staðnum. Þetta var kynnt á fjölmennum fundi í Stöðvarfirði í fyrrakvöld. Samherji, Þróunarfélag Austurlands og sveitarfélagið Austurbyggð kynntu á þeim fundi helstu niðurstöður atvinnuþróunarverkefnis, þar sem leita á lausna í atvinnumálum Stöðvarfjarðar. Hugmyndin er sú að Samherji setji eina til þrjár milljónir í formi hlutafjár í rekstur smærri fyrirtækja sem skapað gætu störf á staðnum og einnig er Samherji tilbúinn að leggja fram húsnæði sitt og aðstöðu á staðnum. Þá hefur Samherji lýst sig tilbúinn að setja umtalsvert fé í almenningssamgöngur á svæðinu og hefur samið við Rekstarráðgjöf Norðurlands um aðstoð fyrir Stöðfirðinga við gerð rekstraráætlana.