Fiskveiðistjórnun hafi mistekist

Ástand þorsksins á Íslandsmiðum er áhyggjuefni, segir forstjóri Hafrannsóknastofnunarinnar. Fiskveiðistjórnunin hefur mistekist, að mati minnihlutans í sjávarútvegsnefnd Alþingis. Fundur var boðaður í sjávarútvegsnefnd Alþingis til að ræða ástand þorskstofnins en í nýlegu togararalli sýndu mælingar á stofninum mjög lélega árganga og stórlækkaða stofnvísitölu. Fulltrúar Hafrannsóknarstofnunarinnar kynntu nefndnarmönnum helstu niðurstöður togararallsins en enn á eftir að meta aflasamsetningu og meðalþyngdir stofnsins þannig að endanlegar niðurstöður liggja ekki fyrir fyrr en um mánaðamótin maí-júní. En hvernig blasir ástandið við Hafrannsóknarstofnuninni? Jóhann Sigurjónsson, forstjóri stofnunarinnar, segist ekki tjá sig um almennt ástand þorskstofnsins á þessu tímapunkti en það sem fram hafi komið sé frekari staðfesting á því árgangurinn 2001 sé mjög lélegur en það nýja sé að árgangurinn 2004 sé líka lélegur.. Það sé út af fyrir sig áhyggjuefni. Guðjón Hjörleifsson, formaður sjávarútvegsnefndar Alþingis, segir að ekki hafi verið um neyðarfund að ræða heldur hafi verið farið fram á það að fundur yrði haldinn til að fara yfir fyrstu niðurstöðu úr togararallinu. Hafrannsóknarstofnunin hafi gert grein fyrir þeim en mikið eigi eftir að rannsaka og sömuleiðis búa til skýrslu þannig farið verði aftur yfir málið í byrjun júní þegar niðurstöður liggi fyrir. Fulltrúar minnihlutans í sjávarútvegsnefnd töldu fátt nýtt hafa komið fram á fundi sjávarútvegsnefndar. Magnús Þór Hafsteinsson, þingmaður Frjálslynda flokksins, segir að fundurinn staðfesti það sem vitað hafi verið fyrir fram, að menn séu fastir í sama fari og þeir hafi verið undanfarin 20 ár og virðist ekki vera tilbúinir að hugsa hlutina upp á nýtt. Aðspurður hvað þurfi að gera til að bregðast við ástandinu segir Magnús Þór að skipta þurfi út mannskap. Þörf sé á nýjum mönnum sem séu tilbúnir að hugsa hlutina upp á nýtt og gera þá öðruvísi en þeir hafi verið gerðir undanfarin 25 ár. Mönnum hafi mistekist í fiskveiðstjórnun.