Svarti galdur

Svart er í tísku. Ekki bara svart heldur svart í svart. Lög af svörtu; svört föt, svartir skór, svartir skartgripir og aukahlutir. Í vetur er svart líka rómantískt. Efnin eru fljúgandi sjiffon, kósý kasmír, þvegið flauel, pelsar, glitrandi steinar og fallegar blúndur.

Svarti galdurinn er hinn klassíski "litli svarti kjóll". Hann er hægt að nota sem grunn við öll tækifæri, með gallabuxum, háum stígvélum, prjónapeysu og svartri tvíhnepptri ullarkápu eða með pinnahælum, svörtum skartgripum, litlum pels og svartri glitrandi tösku. Blandið öllu saman og allt er leyfilegt, það er bara eitt skilyrði, svart í svart!

Einsleitt!

Það sem sjá má á síðum tískutímarita í förðun er matt og drama­tískt. Sansering og glimmer hefur fengið að víkja í bili. Djúpir varalitir og girnilegar varir ráða ríkjum og eru aðalatriðið. Lýtalaus húð með möttum eða náttúrulegum gljáa og hún fær að njóta sín. Brúnir mattir tónar renna saman og gefa rómantískan blæ og skerpa og ýkja vel alla náttúrulega skugga. Nota vel af farða en vinna hann vel með fingrum. Púðra yfir en ekki of mikið. Bara rétt til að "setja" farðann þannig að hann hreyfist ekki. Skyggja vel með sólarpúðri undir kinnbein og aðeins á enni, nef og höku. Nota ca. 3 tóna af augnskugga, byrja á húðlituðum og svo tvo brúntóna liti, í sitt hvorum styrkleika. Nota skal matta liti. Mikið af maskara til að gefa dramatískan blæ. Skerpa augabrúnir ef þarf en hafa þær náttúrulegar. Klára þetta með möttum varalit í blábleiktóna lit sem líkist eigin varalit og velja blýant í sama tóni. Til að gera þetta meira glam má skella glossi yfir augnlok. Heildaryfirbragð er glæsilegt og dramatískt. Einfalt og sterkt.