Sirkus sækir fram

Fjölmiðlafjölskyldan Sirkus ætlar að færa út kvíarnar á næstu dögum. Hún hefur hleypt af stokkunum heimasíðu á vef­slóðinni Sirkus.tv þar sem notendur geta búið til sinn eigin Sirkus-heim.

"Þar verður hægt að stofna bloggsíðu og búa til skrá sem inniheldur upplýsingar um notandann," útskýrir Guðmundur Arnar Guðmundsson, kynningarstjóri Sirkus. "Síðan getur þú hleypt öðru fólki að þér og þannig kynnst öðru fólki," bætir hann við.

Þetta er byggt á tengslaneti sem hefur verið að slá í gegn um allan heim. Bloggæði hefur gripið landann á undanförnum árum og munu tvær af vinsælustu síðunum sameinast Sirkusvefnum en það eru blog.central.is og folk.is.

"Þessar síður telja um þrjátíu þúsund notendur," útskýrir Guðmundur en um þessar mundir er verið að taka við ábendingum frá notendum. "Þannig verður þetta næstu tvær til þrjár vikur," segir Guðmundur.

Sjónvarpsstöðin Sirkus ætlar að setja í fluggírinn á næstunni en á dögunum hófst herferð á vegum hennar þar sem auglýst var eftir hugmyndum að íslenskum þáttum. Þar að auki hefur Sirkus fest kaup á erlendum þáttum sem forsvarsmenn hennar binda miklar vonir við.

"Meðal þeirra er My Name Is Earl sem spáð er jafn mikilli velgengni og Friends en Jason Lee leikur aðalhlutverkið," segir Guðmundur og telur sig hafa fulla innistæðu fyrir öllu. "Það hefur engin sjónvarpsstöð farið af stað með jafn miklum krafti og Sirkus."