Fimm féllu í ómegin við Austurvöll

Hátíðarhöld fóru vel fram í Reykjavík í dag og lögðu tugir þúsunda leið sína í miðborgina. Veðurblíðan var með eindæmum og hitinn var reyndar svo mikill - og kannski hátíðleiki stundarinnar - að ekki færri en fimm féllu í ómegin undir hátíðardagskránni á Austurvelli í morgun. Þjóðhátíðarhöld hófust með hefðbundnum hætti klukkan tíu í morgun þegar forseti borgarstjórnar lagði blómsveig að leiði Jóns Sigurðssonar í Hólavallakirkjugarði. Veðrið lék við hvurn sinn fingur, eins og segir um kýrnar í öðru kvæði, svo fjöldi fólks safnaðist snemma saman á Austurvelli til að fylgjast með hátíðardagskránni þar. Anna Kristinsdóttir, formaður þjóðhátíðarnefndar, setti hátíðina og forseti Íslands, Ólafur Ragnar Grímsson, lagði blómsveig að minnisvarðanum um Jón Sigurðsson með aðstoð tveggja stúdenta. Forsætisráðherra hélt ávarp og að því loknu flutti Þrúður Vilhjálmsdóttir leikkona, sem var í hlutverki fjallkonunnar í ár, „Fjallkonuna“, ljóð sem Vilborg Dagbjartsdóttir orti sérstaklega fyrir þetta tilefni. Dagskráin stóð í um klukkustund og varð sumum það ofviða að standa í steikjandi sólskini allan þann tíma. Það leið yfir einn lögregluþjónanna sem stóðu heiðursvörð, tvo skáta, einn meðlim karlakórsins sem söng nokkur ættjarðarlög og einn eldri mann í áhorfendahópnum, alls fimm manns, enda er þetta hlýjasti 17. júní í sögu lýðveldisins. Flestir kunnu þó vel að meta blíðuna og röltu um bæinn og nutu fjölbreyttrar dagskrár sem í boði var. Hún stendur reyndar enn því það enn í gangi tónleikar við Arnarhól og standa þeir til klukkan tíu í kvöld.