Stoltur af íslensku þjóðinni

Halldór Ásgrímsson forsætisráðherra boðaði breytingar á stjórnsýslu landsins í sinni fyrstu þjóðhátíðarræðu í blíðskaparveðri á Austurvelli í gær. Hann kallaði jafnframt eftir auknu samstarfi ríkis og atvinnulífs á sviði nýsköpunar. "Mennirnir eru jafn ólíkir og þeir eru margir," voru upphafsorð forsætisráðherra. Í ræðu sinni kvaðst Halldór binda miklar vonir við störf endurskoðunarnefndar stjórnarskrárinnar sem skipuð var í byrjun þessa árs. Þá sagði hann ekki síður nauðsynlegt að endurskoða skipulag stjórnsýslunnar. "Það þarf að gera hana markvissari og meira í takt við tímann," sagði forsætisráðherra en síðast fór slík skoðun farið fram árið 1969. "Ég tel mikilvægt að hefjast handa um slíka endurskoðun nú í haust og ljúka henni á tiltölulega stuttum tíma." Halldór gerði að umtalsefni að ekki ætti að einblína á það sem miður færi heldur draga lærdóm af mistökunum og horfa björtum augum á framtíðina. Hann bar í framhaldi af því saman frásagnir af árinu 1955. "Sumir myndu kalla þetta rigningarsumarið mikla, aðrir myndu minnast þess sem ársins þegar Halldór Laxness fékk Nóbelsverðlaunin." Forsætisráðherrann lét þá skoðun enn fremur í ljós að stórfyrirtæki sem skiluðu miklum arði bæru samfélagslega ábyrgð og eðlilegt væri að þau tækju þátt í mikilvægum málum á sviði nýsköpunar, menningar og velferðar. "Þeim ber að nýta hagnað til að byggja upp." Halldór gat þess einnig að Íslendingar væru í fjórða sæti í heiminum yfir þær þjóðir sem sýndu hraðastar framfarir á sviði rannsókna og nýsköpunar. Mikillar bjartsýni gætti í ræðu forsætisráðherra, sem sagði að Íslendingar ættu að bera höfuðið hátt án þess að ofmetnast. "Ég er stoltur af íslensku þjóðinni." "Þetta er auðvitað orðið löngu tímabært, ríkisstjórnin hefur haft tólf ár til þessa verkefnis," sagði Ingibjörg Sólrún Gísladóttir, formaður Samfylkingarinnar, um hugmyndir forsætisráðherra um breytingar á stjórnsýslunni. Jón Bjarnason, þingmaður Vinstri grænna, telur að með tillögum sínum sé forsætisráðherrann að beina sjónum almennings frá ástandinu eins og það er í dag. "Við ættum að endurskoða allt ferlið í kringum sölu á ríkiseignum, þar hefur framganga ríkistjórnarinnar verið með ólíkindum."