Langt í þingfestingu í Baugsmálinu

Einn og hálfur mánuður líður frá því að sakborningum í Baugsmálinu eru birtar ákærur og málið er þingfest.  Ríkislögreglustjóri og yfirmaður efnahagsbrotadeildar eru báðir komnir í frí og er það líkleg skýring á þessum langa tíma. Þegar Sindri Sindrason spurði dómsmálaráðherra hvort þetta teldust ásættanleg vinnubrögð lauk símtalinu skyndilega. Jóhannesi Jónssyni, börnum hans Jóni Ásgeiri Jóhannessyni, forstjóra Baugs og systur hans Kristínu Jóhannesdóttur, Tryggva Jónssyni fyrrverandi forstjóra fyrirtækisins, Stefáni Hilmarssyni og Önnu Þórðardóttur endurskoðendum var birt ákæra þann fyrsta júlí. Málið verður þó ekki þingfest fyrr en sautjánda ágúst og verða ákærur að öllum líkindum ekki gerðar opinberar fyrr en þá, sem þykir ansi langur tími. Ástæðuna telja menn líklega vera að Haraldur Jóhannesson, ríkislögreglustjóri og Jón HB Snorrason, yfirmaður efnahagsbrotadeildar, eru í sumarleyfum og virðist sem þeim þyki í lagi að setja málið á bið í svo langan tíma vegna þess.  Þegar fréttastofan hafði samband við Björn Bjarnason, dómsmálaráðherra um hvort þetta væru ásættanleg vinnubrögð, sagði Björn að hann hefði ekki tök á að ræða málið við fréttamann og að fréttamaður hefði ekki átt aðhringja í GSM síma hans. Síðan lagði hann á. Fréttastofa hefur alls staðar komið að lokuðum dyrum þegar leitað hefur verið svara, einnig innan herbúða Baugsmanna og hafa ýmsir velt því fyrir sér hvers vegna málið er svona mikið leyndarmál, ef allir eru saklausir. Gestur Jónsson, lögmaður Jóns Ásgeirs, sagði þó háskalegt að í jafn umfangsmiklu máli, fari sami maður með stjórn rannsóknar og taki síðan ákvörðun um hvort ákæra skuli eins og yfirmaður efnahagsbrotadeildar gerir í þessu máli. Gestur vildi þó ekki tjá sig frekar um málið að svo stöddu. Endurskoðunarfyrirtækið KPMG hefur birt tilkynningu þar sem segir að starfsmaður fyrirtækisins, Anna Þórðardóttir, hafi sinnti starfsskyldum í samræmi við lög en að fyrirtækið tjái sig ekki frekar um málið á meðan það er til meðferðar dómstóla.