Nauðganir um helgina

Beðið er eftir rannsóknargögnum í báðum nauðgunarmálunum sem komu upp um helgina. Maður er grunaður um nauðgun á Höfn í Hornafirði, en enginn hefur verið handtekinn vegna nauðgunar í Ólafsvík.  Maðurinn sem lögreglan á Höfn í Hornafirði handtók um helgina hefur ekki játað, en hann er á tvítugsaldri. Að sögn lögreglunnar á Höfn er verið að rannsaka sýni sem tengjast málinu og er niðurstaðna úr þeim beðið. Um helgina tilkynnti fimmtán ára stúlka á Ólafsvík um nauðgun og að sér hafi verið byrlað ólyfjan. Samkvæmt framburði stúlkunnar átti nauðgunin að hafa verið framin á salerni á veitingastað í bænum. Enginn hefur verið handtekinn vegna málsins, en stúlkan fór á neyðarmóttöku og er beðið gagna úr þeirri rannsókn. Dómari þarf að yfirheyra stúlkuna þar sem hún er aðeins fimmtán ára gömul, en samkvæmt upplýsingum frá lögreglunni í Ólafsvík hefur það ekki enn verið gert. Stígamót fá reglulega inn konur sem telja sig hafa verið byrlað ólyfjan og nauðgað í kjölfarið. Að sögn Þórunnar Þórarinsdóttur ráðgjafa hjáStígmótum er talið að lyfið Rohypnol og smjörsýra séu notuð í slíkum nauðgunum. Verkan lyfjanna er þannig að viðkomandi dettur út og man ekkert eftir því sem gerðist. Síðustu ár hafa slík mál komið upp með reglulegum millibili.