Bílddælingar slegnir en vongóðir

Allir starfsmenn fiskvinnslufyrirtækisins Bílddælings fengu uppsagnarbréf í lok vinnudags á þriðjudag og er uppsagnarfresturinn einn mánuður. Búist er við að fyrirtækið haldi áfram að starfa en endurskipuleggja á reksturinn meðan uppsagnarfresturinn rennur út. Bílddælingur tók til starfa í febrúar 2003 og réði þá yfir 200 tonna byggðakvóta sem Þórður Jónasson ehf. á Bíldudal hafði fengið úthlutað. Byggðastofnun minnkaði þann kvóta á yfirstandandi fiskveiðiári. Bílddælingur þurfti því að leigja allan kvóta fyrir togskipið Hallgrím BA 77, sem fyrirtækið fór í desember síðastliðnum að gera út ásamt fleiri aðilum, og má rekja erfiðleikana í rekstrinum til þess. Einnig hefur hátt gengi íslensku krónunnar verið því erfitt. Áður en Bílddælingur hóf útgerðina var það einungis fiskvinnslufyrirtæki sem keypti allt hráefni til vinnslu af fiskmörkuðum og smærri bátum, og gekk sá rekstur vel. Guðmundur Guðlaugsson, bæjarstjóri í Vesturbyggð, mótmælir því að úthlutun kvótans hafi leitt til rekstrarstöðnunar fyrirtækisins. "Langmestur hluti þess byggðakvóta sem Vesturbyggð hafði til úthlutunar fór á Bíldudal." 138 tonnum af 218 var úthlutað til báta á Bíldudal og það var samkvæmt reglugerð frá sjávarútvegsráðuneytinu. Vesturbyggð hafði ekki heimild til að úthluta kvóta á fyrirtæki. Enn fremur var það skilyrði fyrir úthlutun kvóta að viðkomandi bátur legði fram að minnsta kosti sama magn af eigin kvóta til vinnslu í sveitarfélaginu. "Ég reikna með að Bílddælingur hafi gert samninga við heimamenn um vinnslu aflans." Hannes Friðriksson, sem rekur veitingastofuna Vegamót á Bíldudal, segir heimamenn vera slegna og að tíðindin hafi verið óvænt. "En ég er bjartsýnn þó þetta hafi komið mér á óvart og hef fulla trú á því að Bílddælingur starfi áfram. Atvinnuástandið hefur verið gott og hér eru öll hús full af fólki." Ekki náðist í framkvæmdastjóra Bílddælings.