Sóttur á Reykjaneshrygg

Landhelgisgæslan sótti slasaðan sjómann í togarann Ostrovet frá Dóminíku í fyrrinótt. Sjómaðurinn, sem var rússneskur, hafði að sögn áhafnar hlotið stungusár á kvið við fiskvinnslu um borð. Þegar tilkynnt var um slysið var togarinn 268 sjómílur frá landi. Þyrlan fór í loftið um fjögur um nóttina og fékk fylgd frá þyrlu varnarliðsins sökum þess hve fjarlægðin var mikil. Vel gekk að hífa manninn um borð og þurfti ekki að senda sigmann niður í skipið þegar að var komið þar sem fjórir skipverjar úr varðskipinu Óðni voru þá komnir um borð. Þyrlan var komin til Reykjavíkur rúmlega átta í gærmorgun og var hinn slasaði fluttur á sjúkrahúsið í Fossvogi. Samkvæmt upplýsingum frá togaranum var hinn slasaði 29 ára karlmaður frá Rússlandi, en flestir í áhöfn skipsins eru Rússar.