Vill fyrirbyggja málverkafalsanir

Viktor Smári Sæmundsson, forvörður, fékk á síðasta föstudag 400.000 króna styrk frá Rannsóknarsjóði Listasafns Háskóla Íslands til að vinna sjálfstætt að söfnun og rannsóknum á höfundarmerkingum frumherja íslenskrar myndlistar. "Þetta eru framhaldsrannsóknir sem ég er að byggja ofan á þekkingargrunn sem þegar er til staðar," segir Viktor Smári, sem er í rauninni að halda áfram þeirri vinnu sem hann hóf meðan rannsóknin á stóra málverkafölsunarmálinu stóð yfir. Málatilbúnaðurinn byggðist að miklu leyti á rannsóknum Viktors Smára. Hæstiréttur snéri sakfellingu héraðsdóms upp í sýknu á sínum tíma og réði þar mestu að rannsóknir Viktors Smára voru ekki dómteknar þar sem hann vann hjá Listasafni Íslands sem var kærandi í málinu. Viktor er nú hættur hjá Listasafni Íslands og ætlar að halda áfram að safna saman höfundarmerkingum frumherjanna og byggja upp gagnagrunn um höfundarmerkingar frumherja íslenskrar myndlistar. "Ég vonast til þess að þetta hjálpi mönnum í framtíðinni til að þekkja upprunalegar áritanir," segir Viktor Smári.