Ný vefsíða tekin í notkun

Síðast liðinn föstudag var opnuð ný heimasíða Félags fasteignasala á slóðinni ff.is. Á síðunni eru upplýsingar annars vegar til þeirra sem hyggja á kaup fasteignar og á hinn bóginn til þeirra sem ætla sér að selja fasteign sína. "Reynt er að skýra út ferli viðskiptanna lið fyrir lið og hvað það er helst sem neytendur þurfi að hafa í huga," segir Grétar Jónasson, formaður Félags fasteignasala. Upplýsingar á síðunni eru aðgengilegar og auðveldar í notkun en í hverri viku munu birtast nýjar fréttir á forsíðu vefsins af fasteignamarkaðinum, bæði fróðleikur og fréttir á léttum nótum. "Þá er einnig fjallað um það hvaða kröfur megi gera til fasteignasala í gegnum allt ferli viðskiptanna en mikilvægt er fyrir neytendur að átta sig á þeim miklu skyldum og þeirri ábyrgð sem á fasteignasölum hvíla," segir Grétar. Á heimasíðunni er búið að setja upp orðabók þannig að fólk geti áttað sig á þýðingu ýmissa orða sem koma fyrir í fasteignaviðskiptum og þar er einnig listi yfir alla fasteignasala og fasteignasölur auk ýmissa gagnlegra upplýsinga. Slóð heimsíðunnar er ff.is.