Mikil flóð í Mið--Evrópu

Hundruð manna hafa þurft að yfirgefa heimili sín í suðurhluta Þýskalands sem og í Austurríki og Sviss vegna flóða og hafa björgunarsveitir og herinn haft í nógu að snúast. Tala látinna vegna flóðanna í löndunum þremur er komin í sex en tveggja til viðbótar er saknað í Sviss. Úrhelli hefur verið í Ölpunum norðanverðum á síðustu dögum og hafa ár flætt yfir bakka sína. Þá er rafmagnslaust víða í þessum löndum og drykkjarvatn mengað. Þá eru mörg þorp einangruð vegna skemmda á vegum og járnbrautum og hefur björgunarstarf gengið erfiðlega vegna þess.