Spurning um reynslu og bakgrunn

"Ég tel mig hafa þá reynslu, þekkingu og getu sem þarf til að takast á við þetta verkefni. Ég tel að hún muni nýtast mjög vel," segir Lúðvík Bergvinsson þingmaður, sem hefur gefið kost á sér í embætti varaformanns Samfylkingar. "Hlutverk varaformannsins er auðvitað fyrst og fremst að vera annar tveggja forystumanna flokksins, í öðru lagi að vinna að stefnumótun flokksins og í þriðja lagi að koma fram fyrir hönd flokksins," segir Lúðvík aðspurður hvernig hann sjái fyrir sér að starfa nái hann kosningu í embættið. "Síðan er náttúrlega þátttaka í uppbyggingu flokksins, þannig að það eru næg verkefni." Þó að Lúðvík og Ágúst Ólafur séu báðir í hópi ungra þingmanna er bakgrunnur þeirra að nokkru leyti ólíkur, Ágúst er úr Reykjavík en Lúðvík upprunalega úr Vestmannaeyjum, þar sem hann leiddi V-listann í síðustu bæjarstjórnarkosningum. Þar sem stundum hefur verið bent á að komi formaður flokks úr Reykjavík sé heppilegt að varaformaðurinn komi af landsbyggðinni var Lúðvík spurður hvort hann teldi þetta skipta máli. "Ég held að það sem skipti sköpum í þessu, alveg sama hver er, sé hver reynsla og bakgrunnur manna er, og þ. á m. hvaðan þeir koma. Ég hef sagt að forysta flokks sem ætlar að vera í forystu í stjórnmálum á Íslandi verður að hafa breiða skírskotun." Lúðvík hefur frekar verið talinn til Ingibjargararms Samfylkingar en Össurar. Hann gefur þó lítið fyrir slíkar merkingar. "Ég er á eigin forsendum í mínu framboði, ég hef verið það allan tímann. Ég hef starfað með Össuri í fimm ár og það hefur gengið vel. Ég hef líka sagt að fáir hafa afrekað það sem Ingibjörg hefur gert." Hann kveðst reiðubúinn að starfa með hvoru sem er. "Þetta er bara spurning um hverja flokkurinn vill kalla til verka."