Vilja kanna einkaframkvæmd

"Sundabrautin er eins og aðrar stórframkvæmdir í vegagerð að það þarf sérstaka fjármögnun til verksins," segir Sturla Böðvarsson samgönguráðherra en engar framkvæmdir eru ráðgerðar vegna hennar næstu fjögur árin samkvæmt nýrri samgönguáætlun. Sturla segir Sundabraut enn vera eitt mikilvægasta samgönguverkefnið sem framundan er en óljóst sé með hvaða hætti slík framkvæmd verði fjármögnuð. "Þar eru tveir kostir sem til greina koma. Annars vegar einkaframkvæmd eða að ríkið taki frá sérstaklega fjármuni til þessa verkefnis." Steinunn Valdís Óskarsdóttir borgarstjóri vill skoða möguleika einkaframkvæmdar. Hún leggst hins vegar alfarið gegn gjaldtöku á vegfarendur. "Vegagjöld koma ekki til greina af hálfu borgarinnar. Ríkið greiðir Sundabraut. Samgönguráðherra hefur sagt að hann telji að það þurfi að fjármagna hana á sérstakan hátt með einkaframkvæmd. Ég lít ekki svo á að þó menn fari í einkaframkvæmd að það þýði endilega gjaldtöku. Ég er algjörlega mótfallin því að það verði tekið gjald á fyrsta áfanga Sundabrautar því það er ekki tenging á milli landshluta heldur á milli hverfa í borginni." Aðspurður hvort hugmyndir séu uppi um gjaldtöku af vegfarendum um Sundabraut í ljósi skýrslu sem nefnd á vegum ráðuneytisins skilaði þar sem velt er upp möguleikum á gjaldtöku í vegakerfinu segist Sturla ekki hafa tekið afstöðu til þess. "Það liggur fyrir nefndarálit þar sem tillögur eru gerðar um gjaldtökur vegna fjármögnunar umferðarmannvirkja og bent á þann kost að láta vegfarendur greiða sérstaklega á þeim stöðum sem umferð er mikil. Gagnvart Sundabraut er ljóst að þeir fjármunir sem fengjust með slíku gjaldi yrðu vel þegnir en gæta þarf hófs í þessum málum og ég hef heldur ekki tekið afstöðu til þess hvort slíkt sé almennt fýsilegur kostur." Vilhjálmur Þ. Vilhjálmsson, leiðtogi sjálfstæðismanna í borgarstjórn, segist reiðubúinn að ræða upptöku vegagjalda í umferðinni ef það er á víðum grundvelli og taki til dýrra mannvirkja úti um allt land. "En það kemur ekki til greina ef menn einblína bara á Sundabrautina."