Stálinu stappað í íslenska karlmenn

Einleikur Auðuns Blöndal, Typpatal, í leikstjórn Sigurðar Sigurjónssonar, snýst eins og nafnið gefur til kynna um typpi og allt sem tengist þeim. Einleikurinn var saminn af Richard Herring sem mótvægi við hinum vinsælu Píkusögum. Er hann byggður á könnun sem höfundurinn gerði á netinu og var beint jafnt til karla og kvenna.

Sýningin með Audda í aðalhlutverki var nokkurs konar blanda af uppistandi og fyrirlestri. Þar skoðaði hann með hjálp skjávarpa svörin við hinum ýmsu spurningum sem lagðar voru fram í könnuninni, sem margir hafa eflaust spurt sjálfa sig að en ekki þorað að spyrja aðra. Þar komu fram ýmis skondin svör sem leiddu margt áhugavert í ljós varðandi kynlífshegðun almennings.

Auddi talaði einnig um að nú á dögum skömmuðust karlmenn sín fyrir typpin sín og hvatti þá til að hætta því snarlega, enda voru þau stolt manna og yndi fyrr á öldum. Vangavelturnar um það hvort stærðin skipti máli voru einnig skemmtilegar. Reyndi hann hvað eftir annað að stappa stálinu í karlmenn og hvatti hann einnig konur til að sýna körlum meiri virðingu þegar kemur að typpunum þeirra.

Auddi sýndi fádæma yfirvegun í frumraun sinni á leiksviði. Greinilegt er að hin gífurlega reynsla sem hann hefur úr sjónvarpinu hjálpar honum mikið. Ekki má gleyma danstöktum hans, því allt ætlaði um koll að keyra í salnum þegar hann brá sér í Michael Jackson-gírinn og braut þannig sýninguna skemmtilega upp. Langflestir brandararnir hittu í mark og átti Auddi auðvelt með að koma þeim frá sér á réttan hátt.

Þýðanda verksins, Jóni Atla Jónassyni, hefur tekist vel upp í því að færa Typpasögurnar í íslenskt umhverfi og fór textinn aldrei yfir strikið í dónaskap. Ekki má heldur gleyma þátttöku Audda, Sigga Sigurjóns og Hallgríms Helgasonar í þýðingunni.

Það sem helst mátti finna að sýningunni var sú staðreynd að hléið, sem átti að vera í 15 mínútur, teygðist upp í 35 mínútur og voru margir orðnir ókyrrir þegar Auddi mætti loksins aftur á sviðið. Einnig hefði Nasa mátt vera reyklaus með öllu, rétt eins og venjan er í leikhúsum.

Mengað andrúmsloftið gæti orðið til þess að letja reyklausa áhorfendur til að sjá þessa annars skemmtilegu sýningu.