Aukin afþreying í farsímum

Og Vodafone kynnti á föstudag nýja þjónustu fyrir farsímanotendur sem gerir þeim kleift að spila tölvuleiki, sækja fréttir og nálgast aðra afþreyingu í gegnum símann sinn í mun meira magni og betri gæðum en áður hefur þekkst. Þjónustan sem nefnist Vodalive! var fyrst kynnt í Bretlandi árið 2002.

Þeir sem nýta sér þjónustuna þurfa að borga fyrir hana en fá ávallt upp á símaskjáinn hvað tiltekin þjónusta kostar. "Þessi þjónusta er ný á Íslandi, nú erum við ekki eingöngu að flytja símtöl heldur alls konar afþreyingu, leiki, tónlist, hringtóna og fréttir," segir Björn Víglundsson, markaðsstjóri Og Vodafone á Íslandi.

Til að nýta sér þjónustuna þarf sérstaka gerð af farsímum sem eru nýir á markaðnum. "Við gerum fastlega ráð fyrir því að þessi þjónusta eigi eftir að verða vinsæl hér á landi, hún hefur notið mikilla vinsælda í Evrópu þar sem hún hefur verið kynnt," segir Björn.