Stefna áfram að eigin vatnsveitu

Formaður bæjarráðs Kópavogs fagnar vilja Orkuveitu Reykjavíkur til lækkunar á vatnsverði til Kópavogsbæjar. Hann segir bæinn engu að síður stefna að eigin vatnsveitu á næsta ári. Stjórn Orkuveitu Reykjavíkur ákvað í vikunni að bjóða Kópvavogsbæ að kaupa vatn á sama verði og Seltjarnarnes og Mosfellsbær, en síðustu ár hefur umsamið verð Kópavogsbæjar um vatn frá Orkuveitunni verið talsvert hærra en hjá hinum sveitarfélögunum tveimur. Gunnar I. Birgisson, formaður bæjarráðs Kópavogs og verðandi bæjarstjóri, hafi ekki heyrt um að samþykkt hefði verið að bjóða Kópavogi lægra verð þegar fréttastofa Stöðvar 2 ræddi við hann en sagði að ef það væri svo fagnaði hann því. En breytir lækkunin einhverju varðandi vatnsveituframkvæmdir Kópavogsbæjar? Gunnar segir að þær geri það ekki enda muni verðið vera mun betra þegar framkvæmdum er lokið. Auk þess hafi Kópavogsbær fjárfest fyrir um 200 milljónir í hinni nýju vatnveitu þannig að bærinn haldi ótrauður áfram þeirri vinnu, en reiknað sé með að vatnsveitan verði tekin í notkun á næsta ári. Kópavogsbær vinnur að gerð vatnsveitunnar í Vatnsendakrikum en það hefur tafið framkvæmdirnar að Reykjavíkurborg hefur neitað bænum um að leggja vatnsleiðsu í gegnum land borgarinnar. Gunnar vonar að farsæl lausn finnist á málinu en beðið er eftir úrskurði iðnaðarráðherra vegna þess. En mun Kópavogsbær hindra Orkuveituna í að fara í gegnum land Kópavogs vegna Hellisheiðarvirkjunar verði framkvæmdir Kópavogsbæjar tafðar frekar? Gunnar segir það hálfgerðan sankassaleik sem hann vilji ekki taka þátt í en þessi möguleiki sé fyrir hendi og borgaryfirvöld þurfi að vita af því.