Framkvæmdir gætu hafist 2007

Fulltrúar Norðuráls á Grundartanga, Reykjanesbæjar og Hitaveitu Suðurnesja undirrituðu í gærkvöldi samkomulag um að kanna möguleika á rekstri álvers í Helguvík. Framkvæmdir gætu hafist árið 2007. Málið snýst um hvort nægilegri raforku sé hægt að koma í Helguvík en Hitaveita Suðurnesja mun í samstarfi við Orkuveituna og Landsvirkjun vinna að þeim málum. Júlíus Jónsson, forstjóri HItaveitu Reykjaness, segir stjórnendur Norðuráls þó ekki myndu hafa haft samband ef Helguvík væri ekki fýsilegur kostur. Hann hafi engar efasemdir um vilja Norðuráls til að byggja álver á þessum stað en málið snúist um það hvort það takist að útvega nægilega raforku til þess að álverið geti farið af stað. Árni Sigfússon, bæjarstjóri í Reykjanesbæ, segir að um sé að ræða áhugavert sóknarfæri fyrir Reykjanesbæ og nágrannabyggðir. Þetta styrki undirstöðunar fyrir atvinnulífið á Suðurnesjum gríðarlega mikið og skapi feiknarlega möguleika. Árni er bjartsýnn á að samningar náist. Hann telji að margar mjög góðar forsendur séu fyrir hendi. Menn hafi farið yfir hentugar staðsetningar fyrir álver á Suðvesturlandi og Helguvík komi þar mjög vel út. Árni segir að vel hafi verið gætt að umhverfissjónarmiðum. Rík áhersla sé lögð á að farið verði vel yfir þá þætti þannig að það sé tryggt að allt sem snúi að umhverfinu sé vel gert. Aðspurður hvort hann telji að fram undan sé barátta við önnur svæði um álver segir Árni að það þurfi ekki að vera. Hann telji að viðskiptasjónarmið ráði fyrst og fremst ferðinni, hvar góðar hafnir séu og mannskapur til að vinna í álveri og hvernig umhverfisskilyrðum sé fullnægt. Ef einhver annar staður reynist hentugri þá telji hann mjög skynsamlegt að velja þann stað. Helguvík sé hins vegar mjög góður staður. Það er að mörgu að huga og Ragnar Guðmundsson, famkvæmdastjóri fjármála- og stjórnunarsviðs Norðuráls, segir að áður en framkvæmdir geti hafist þurfi að vinna umhverfismat fyrir álver og flutningsmannvirki á raforkunni og raforkuframleiðslunni. Þegar það liggi fyrir verði hægt að taka ákvörðun um hvort álver verði reist í Helguvík. Verkefnið er ekki ókeypis. Ragnar segir að kostnaður við mat á umhverfisáhrifum fyrir álver hlaupi á tugum milljóna króna en hann hafi ekki upplýsingar um það hvað það kosti fyrir virkjanir og flutningslínur.