Enn ekki náðst í 20 Íslendinga

Ekki hefur enn tekist að ná í rúmlega tuttugu Íslendinga, sem talið er að séu í Lundúnum, en hjá utanríkisráðuneytinu er verið að reyna að hafa uppi á þeim að sögn Illuga Gunnarssonar, aðstoðarmanns utanríkisráðherra. Símasamband við borgina er slæmt frá því sprengjuárásirnar voru gerðar þar í morgun og er erfitt að ná sambandi við farsíma. Samkvæmt upplýsingum frá utanríkisráðuneytinu hefur mikið verið hringt í upplýsingasímann 545 9900, enda fjöldi Íslendinga á ferðalagi eða starfandi í Lundúnum um þessar mundir. Ólafur Ragnar Grímsson, forseti Íslands, sendi Elísabetu Bretadrottningu og Tony Blair samúðarkveðjur í dag eins og fjöldi annarra þjóðarleiðtoga víða um heim. Ólafur Ragnar sagði að hann, Dorrit Moussaieff, eiginkona sín, og Íslendingar allir vottuðu þeim og bresku þjóðinni djúpa samúð vegna hinna hræðilegu hryðjuverkaárása í Lundúnum. Hugurinn væri hjá hinum særðu og fjölskyldum hinna látnu og slösuðu. Forsetinn sagði ennfremur að brýnt væri að sýna á þessari stundu víðtæka samstöðu allra þjóða og að Íslendingar hétu Bretum einlægum stuðningi á erfiðum tímum. Halldór Ásgrímsson forsætisráðherra hefur einnig sent forsætisáðherra Bretlands samúðarskeyti vegna hryðjuverkanna í morgun og hefur ríkisstjórnin jafnframt ákveðið í ljósi þessara hörmulegu atburða að flaggað skuli í hálfa stöng við opinberar stofnanir í dag. Þá hefur íslenska þjóðkirkjan vottað sendiráði Bretlands á Íslandi samúð og hefur þeim tilmælum verið beint til presta að þeir opni kirkjur sínar klukkan sex í kvöld til að taka á móti fólki og leiða það í fyrirbæn fyrir fórnarlömbum árásanna í Lundúnum. Fyrirbænastund vegna atburðanna verður í Dómkirkjunni í Reykjavík klukkan átta í kvöld.