Jarðstreng frekar en loftlínu

Náttúruverndarsamtök Íslands og Fuglavernd hafa sent stjórn og eigendum Hitaveitu Suðurnesja áskorun um að leggja jarðstreng í stað loftlínu að virkjuninni á utanverðu Reykjanesi. Upphaflega áformaði Hitaveita Suðurnesja að leggja jarðstreng og telja samtökin rangt að breyta þeim áformum í ljósi verulega neikvæðra áhrifa sem loftlína hefði í för með sér. Í tilkyningu frá náttúruverndarsamtökunum segir að í úrskurði Skipulagsstofnunar frá 4. ágúst komi fram að verndargildi svæðisins sé mikið og stjórnvöld hafi staðfest það með nýju aðalskipulagi Reykjanesbæjar og náttúruverndaráætlun 2005-2008. Í því ljósi sé vart ásættanlegt að afskrifa lagningu jarðstrengs næst virkjuninni í stað loftlínu. Þá segi í úrskurðinum að loftlína hafi í för með sér verulega neikvæð áhrif á upplifun ferðamanna og að það séu hagsmunir ferðaþjónustunnar að framkvæmdir á svæðinu dragi ekki úr aðdráttarafli þess. Að öllu samanlögðu segja samtökin ljóst að loftlína á utanverðu Reykjanesi samræmist ekki umhverfisstefnu Hitaveitu Suðurnesja og því hljóti fyrirtækið að falla frá þeim áformum.