Framsóknarflokkurinn stefnulaus?

Össur Skarphéðinsson, formaður Samfylkingarinnar, telur skondið að meginniðurstaða umræðna um Evrópumálin sé að Framsóknarflokkurinn ætli hugsanlega að móta sér stefnu meðan flestir aðrir flokkar hafi skýra stefnu um þau mál. "Þarna hefur Framsókn fylgt hefðinni, er opin í báða enda og kemur stefnulaus í Evrópumálum út úr þessu þingi. Merkilegast er að eftir mikinn lúðrablástur í upphafi flokksþingsins kom í ljós að innan samstarfsflokksins í ríkisstjórn reis greinilega mikil andstaða gegn þessu hjá Framsókn. Það virðist því sem svo að Sjálfstæðisflokkurinn hafi tekið fram fyrir hendur Framsóknarflokksins og mótað stefnu hans. Og komist upp með það." Steingrímur J. Sigfússon, formaður Vinstri grænna, segir að ályktun um utanríkismál sem samþykkt var á flokksþingi Framsóknarflokksins virki sérkennilega á sig í ljósi þess að formaður flokksins sé forsætisráðherra í ríkisstjórn sem hafi allt aðra stefnu í stjórnarsáttmála en komi fram í ályktuninni. "Maður veltir fyrir sér hvað þessar æfingar eiga að þýða, hvort þetta hefur þá líka áhrif inn í stjórnarstefnuna og þá nefnd sem er að störfum og fyrrverandi forsætisráðherra skipaði í allgóðu samkomulagi allra flokka. Maður veltir líka fyrir sér hvort maður eigi að taka þetta alvarlega," segir hann. "Það er líka spurning um það hvort þeir séu að senda einhver skilaboð til samstarfsflokksins eða hvort þeir séu að undirbúa einhverjar breytingar, jafnvel breytt stjórnarmynstur á næsta kjörtímabili. Það væri nærtækt að láta sér detta það í hug." Sólveig Pétursdóttir, formaður utanríkismálanefndar Alþingis, segir að aðildarumsókn að Evrópusambandinu sé ekki á dagskrá ríkisstjórnarinnar og hún sjái ekki að ályktun framsóknarmanna breyti því að neinu leyti.