Lagaskilyrði skorti fyrir leyfi

Lagaskilyrði skortir fyrir starfsleyfi Alcoa, segir dósent í umhverfisrétti við Háskóla Íslands. Í framhaldi af dómi Hæstaréttar verður að fara fram nýtt umhverfismat um álver í Reyðarfirði. Engu að síður verður starfsleyfi, sem byggist á umhverfismati, ekki afturkallað, meðal annars vegna þess að leyfishafinn gerir sér réttmætar væntingar um að halda leyfinu, hann hafi ekkert brotið af sér. Dómurinn varði stjórnsýslu ríkisins. Aðalheiður Jóhannsdóttir, sérfræðingur í umhverfisrétti, segir í samtali við Morgunblaðið að það skipti ekki öllu máli að Hæstiréttur felldi ekki úr gildi framkvæmdaleyfið og starfsleyfið, aðalatriðið sé að ákveðin lagaskilyrði séu ekki uppfyllt. Óheimilt sé að gefa út leyfi, þar með talið starfsleyfi, fyrir matsskyldri framkvæmd fyrr en úrskurður um mat á umhverfisáhrifum liggi fyrir. Viðkomandi stjórnvöld hljóti að taka afstöðu til starfsleyfisins þar sem grundvöllur þess sé brostinn, segir Aðalheiður í Morgunblaðinu. Meginskilyrði starfsleyfisins, í þessu tilviki mat á umhverfisáhrifum, sé ekki lengur uppfyllt.