Uppselt á útgáfutónleika

Uppselt er á útgáfutónleika syst­kinanna KK og Ellenar í Fríkirkjunni í Reykjavík næstkomandi fimmtudag. Þau gáfu nýlega út plötuna Jólin eru að koma sem hefur að geyma falleg jólalög í berstrípuðum kassagítarbúningi.

Á tónleikunum verða spiluð lög af plötunni ásamt eldri lögum þeirra systkina. Einnig verða ýmsar óvæntar perlur dregnar upp úr geymsluhólfinu. Sérstakir gestir verða þeir Þorsteinn Einarsson á gítar, Petter Winnberg á kontrabassa og Eyþór Gunnarsson á píanó.

Eftir útgáfutónleikana halda þau KK og Ellen í stutta ferð um landið. Fyrstu tónleikarnir verða á Eiðum á laugardag og þeir síðustu á Ólafsfirði 18. desember. Jólin eru að koma er fyrsta platan sem KK og Ellen vinna saman. Þau hafa áður gert saman eitt og eitt lag, þar á meðal When I Think of Angels.