Jólasprell stórsveitar

Stórsveit Reykjavíkur heldur sína árlegu jólatónleika í Þjóðleikhúskjallaranum í kvöld undir yfirskriftinni Majones jól. Stjórnandi verður Jagúarkappinn Samúel S. Samúelsson og einsöngvari hinn dularfulli, kynþokkafulli og ástsæli raulari Bogomil Font.

"Þetta verða engir venjulegir jólatónleikar. Við ætlum ekkert að hafa þetta óskpalega alvarlegt," segir Sigurður Flosason saxófónleikari, sem hefur spilað með Stórsveitinni frá upphafi. Flutt verður fjölbreytt innlend og erlend jólatónlist í djassbúningi, m.a. glænýjar útsetningar Samúels Samúelssonar og Daniels Nolgård, gerðar sérstaklega fyrir þessa tónleika.

Meðal annars verða flutt ný og spennandi jólalög á borð við Majones jól og Hinsegin jólatré. Reikna má með líflegum tónleikum þar sem húmorinn og gleðin verða með í för. Tónleikarnir eru liður í undirbúningi að plötugerð Stórsveitarinnar, sem ætlar að senda frá sér jólaplötu í óhefðbundnum dúr fyrir næstu jól.

"Það verður allt í þessum öfugsnúna gír með okkar prívat húmor," segir Sigurður. "Við byrjuðum á þessu í fyrra og erum að safna í sarpinn fyrir plötuna."