50 lögreglumenn sárir í Belfast

Óeirðir héldu áfram í Belfast í gærkvöldi og í morgun, þriðja daginn í röð. Tæpur áratugur er síðan annað eins ástand hefur skapast þar, en 50 lögreglumenn liggja sárir eftir átök helgarinnar. Það er auðvitað ljóst að ástæða þessara miklu átaka er mun djúpstæðari en sú að Óraníureglan hafi ekki fengið að ganga nákvæmlega þá leið sem hún vildi í árlegri marseringu sinni um borgina til að fagna sigri mótmælenda í orrustu fyrir 400 árum. Lögregla segir ekki fara milli mála að herskáir hópar öfgamanna hafi haft hönd í bagga við að skipuleggja aðgerðirnar og hafi aðeins beðið eftir tækifærinu til að hefja ofbeldisverkin og draga aðra með sér í þau. Fram að helgi hafi flestir Norður-Írar verið uppteknari af sigri knattspyrnulandsliðsins á því enska en því hvort Óraníumenn mættu þramma um einhverjar tilteknar götur eða ekki. Sprengjuverksmiðja fannst við húsleit í gær og sjö skotvopn. Hálfgert stríðsástand hefur ríkt í sumum hverfum Belfast þar sem mótmælendur hafa hrúgað upp bílflökum og búið til götuvirki, og ráðist á lögreglu með öllu því sem tiltækt er, heimagerðum sprengjum, flöskum fullum af bensíni, múrsteinum og hverju því sem hönd á festir. Átján lögreglumenn til viðbótar slösuðust í gær og í nótt og eru þeir því samtals orðnir 50 sem hafa særst yfir helgina. Óraníumenn hafa sagt að göngunefndin sem ákveður hvar megi ganga og hvar ekki dragi taum kaþólikka auk þess sem þeir eru ósáttir við hversu hratt Bretar hafa dregið lögreglu- og herlið sitt frá Norður-Írlandi í kjölfar samkomulags við Írska lýðveldisherinn um afvopnun hans. En fyrir utan þessar pólitísku ástæður þá kraumar óánægja meðal hópa mótmælenda með stöðu sína. Heilu hverfin eru í niðurníðslu, fátækt og menntunarleysi er almennt og þá verður kveikjuþráðurinn oft stuttur þegar heilu hópunum finnst samfélagið hafa brugðist sér. Stjórnvöld hafa gert sér grein fyrir því að þessu þarf að breyta en hafa lent í vítahring. Ef meira fé er lagt fram til að styðja fátæka, óánægða mótmælendur í verkamannastétt þá endar féð oftar en ekki í höndunum foringjum herskárra öfgahópa sem ýta undir enn frekari deilur.