Risaflugfélag á Íslandsmarkað

"Þeir telja orðið að Ísland sé vænlegur og spennandi kostur enda sívaxandi áhugi á ferðum hingað til lands," segir Bolli Valgarðsson, talsmaður breska flugfélagsins British Airways hér á landi. Flugfélagið hyggst hefja reglulegar ferðir hingað til lands í mars á næsta ári og mun þá samkeppnin harðna til muna á þessari flugleið þar sem fyrir eru Icelandair og Iceland Express. Samkvæmt tilkynningu BA verður flogið fimm sinnum í viku frá og með mars á næsta ári og verður fargjald þeirra fram og til baka 22.990 krónur. Er það til að mynda ódýrara en ódýrasta fargjald Icelandair í dag sem er 24.930 krónur en ódýrustu sæti Iceland Express eru mun lægri eða undir 20 þúsundum króna. Birgir Jónsson, framkvæmdastjóri Iceland Express, fagnar þessum tíðindum og telur víst að Icelandair missi stærri spón úr aski sínum vegna nýs keppinautar en sitt fyrirtæki geri. "Fyrir það fyrsta er Icelandair miklu sterkara á þessari leið en við og auk þess er British Airways sams konar flugfélag og Icelandair. Hvorugt þeirra er í raun að berjast á þessum lággjaldamarkaði sem við einbeitum okkur að og tilkoma BA held ég að breyti ekki miklu fyrir okkur." Athygli vekur að þetta er í annað sinn sem félagið hefur áætlunarflug hingað en flugfélagið Go sem flaug hingað í stuttan tíma fyrir nokkrum árum síðan var dótturfyrirtæki BA. BA ætli þó í þetta sinn að láta slag standa og er ekki um tilraunaflug að ræða. Bolli Valgarðsson segir aðstæður aðrar og betri nú að mati forráðamanna flugfélagsins. "Ísland verður einn af fjórum nýjum áfangastöðum félagsins á næsta ári og þeir sjá hag í því að fljúga hingað þrátt fyrir að samkeppni á leiðinni hafi aukist frá því sem áður var enda er ferðamönnum jafnt og þétt að fjölga alls staðar í heiminum og það á líka við um Ísland." Ekki náðist í Guðjón Arngrímsson, blaðafulltrúa Icelandair, vegna málsins.