Djúpt snortinn af framtakinu

Plata með nýju útgáfunni af laginu Hjálpum þeim kemur í verslanir í dag. Platan inniheldur, auk nýju útgáfunnar sem tekin var upp af Þorvaldi Bjarna Þorvaldssyni, ósungna karókí-útgáfu, sem og upprunalegu útgáfuna frá árinu 1985. Jónas Þórir Þórisson frá Hjálparstarfi kirkjunnar segist vera djúpt snortinn af framtaki tónlistarmannanna sem sungu lagið og allra hinna sem stóðu að verkefninu.

Jónas Þórir var við hjálparstörf í Eþíópíu þegar fyrri útgáfan kom út en situr nú hinum megin borðsins. "Mér finnst þessi nýja útgáfa mjög skemmtileg. Hún vekur hjá mér sömu tilfinningar og lagið í upphafi gerði eftir að ég fékk það sent á kassettu suður til Eþíópíu," segir Jónas. "Allir voru fúsir til að taka þátt í verkefninu og enginn spurði hvort hann fengi eitthvað fyrir. Að sjá bara gleðina og geislunina þegar fólkið söng í Salnum gaf það mér staðfestingu á því að það á stórt hjarta," segir hann. "Menn hafa verið fljótir til þegar eitthvað bjátar á, ekki bara listafólkið, heldur fullt af tæknifólki líka. Þetta er ótrúlegt mitt í allri þessari peningjahyggju sem ræður ríkjum hér."

Platan kostar aðeins þúsund krónur og rennur allur söluhagnaður, fyrir utan virðisaukaskatt, óskiptur til söfnunarátaks Hjálparstarfs kirkjunnar vegna hamfaranna í Pakistan og hungursneyðar og annars neyðarástands víða um heim. Platan er fáanleg í öllum verslunum Hagkaupa og völdum verslunum Bónuss, 10-11 og Top Shop um land allt.