Klippa þurfti farþega út úr bíl

Alvarlegur árekstur varð á Suðurlandsvegi í gær þegar þrír jeppar lentu saman og þurfti að loka veginum í hátt á þriðja tíma. Áreksturinn varð klukkan 15.30 til móts við Þórustaði í Ölfusi. Klippa þurfti ökumann einnar bifreiðarinnar út úr bílnum. Fimm manns þurfti að flytja á sjúkrahús, þar af tvo alvarlega slasaða.

Að sögn Hlyns Þorsteinssonar, læknis á slysadeild Landspítalans í Fossvogi, var þó enginn þeirra lífshættulega slasaður. "Fjórum bílum var ekið til vesturs, sá fremsti beygði til vinstri inn á afleggjarann að Þórustöðum. Sá sem aftast ók áttaði sig ekki í tíma á því að röðin hafði nánast stöðvast og ók á ökutækið fyrir framan," segir Svanur Kristinsson, varðstjóri hjá lögreglunni á Selfossi, um tildrög árekstursins. "Sá sem ekið var aftan á fór yfir á öfugan vegarhelming og lenti framan á jeppling sem ekið var til austurs. Úr varð hörkuárekstur," segir Svanur.