Veiðimaðurinn Uma

Bandaríska leikkonan Uma Thurman er í veiðihug. Hún hefur þó ekki í hyggju að fá sér skotleyfi heldur hyggst Kill Bill-leikkonan ná sér í kærasta. Hún hefur verið að hitta hóteleigandann Andre Balazs en tekur skýrt fram í viðtölum að hún sé ekki bundin í báða skó.

Uma hefur verið á lausu síðan hjónabandi hennar og Ethan Hawke lauk árið 2003. Uma segist vera frekar ráðvillt hvað stefnumótareglur varðar og segir erfitt fyrir konur á hennar aldri að komast í samband við hitt kynið. "Ég dáist að karlkyninu og nálgast karlmenn af ástríðu. Ég hef kynnt mér hegðun þeirra mjög gaumgæfilega og veit, líkt og veiðimaðurinn, hvernig bráðin hegðar sér," sagði Uma.