Tónlistin endurheimt fyrir útgáfutónleika

Kira Kira kemur fram á útgáfutónleikum Smekkleysu sem verða haldnir á Nasa í kvöld klukkan 21.00. Aðrir sem koma fram eru Hairdoctor, Megasukk og Siggi Ármann. Alfons X og Ben Frost þeyta skífum á milli atriða. Hópur tónlistarmanna leggur Kiru Kiru, sem heitir réttu nafni Kristín Björk Kristjánsdóttir, lið á tónleikunum.

Þar á meðal er Rúna Esradóttir, kærasta Mugison, sem spilar á píanó og klukkuspil, Þráinn Óskarsson úr Hudson Wayne sem syngur og spilar á gítar og pumpuorgel og Sigtryggur Baldursson sem mundar trommukjuðana.

"Ég hóaði í nokkra góða vini sem ætla að spila músíkina með mér. Ég hef rekið mig á það á þessum tilraunaeldhússferðalögum um heiminn að það hefur verið langmesta stuðið þegar mér hefur tekist að kippa einhverjum með mér. Þegar maður er í heimabæ sínum liggur beint við að nota það tækifæri og safna liði," segir Kristín Björk.

Kristín, sem er einn af stofnendum Tilraunaeldhússins, gaf nýverið út sína fyrstu stóru plötu sem ber heitið Skotta. Um svipað leyti var fartölvu hennar stolið stútfullri af tónlist og óskaði hún þess að fá verðmætin aftur í Fréttablaðinu skömmu síðar. Tónlistin skilaði sér en ekki tókst að endurheimta tölvuna.

"Það voru góðir menn sem sóttu hana ofan í undirdjúpin handa mér," segir Kristín. "Ég var alveg tilbúin að bretta upp ermarnar. Ég safnaði bara liði og var komin upp í níu manna hljómsveit áður en ég vissi af. Ég ætlaði ekkert að láta þennan draum kafna. Ég var í mörg ár að vinna í plötunni og hlakkaði til að halda útgáfuhúllumhæ. Ég ætlaði ekki að láta skjóta mig í kaf. En það er óneitanlega stórkostlegt að þetta sé komið til mín aftur," segir hún. Að sögn Kristínar eru tónleikar hennar misjafnir í hvert skipti sem hún kemur fram.

"Mér finnst skemmtilegt að búa alltaf til nýja og nýja pælingu fyrir hverja tónleika. Þó að við séum níu á útgáfutónleikunum verðum við kannski bara ég og Rúna á næstu tónleikum. Við höfum svolítið verið að hittast heima í stofu og bauka eitthvað," segir Kristín.

Munu þær meðal annars koma fram 17. desember í Jólaseríu Tilraunaeldhússins sem hófst fyrir viku. Þar verður kántrístemningin í fyrirrúmi. Miðaverð á útgáfutónleikana í kvöld er 500 krónur.