Hljóðsprengja á Grand Rokk

Geimkúrekinn og goðsögnin bandaríska Bob Log III mætti á Grand Rokk á laugardagskvöld og spilaði fyrir stútfullu húsi. Pönk­sveitin Rass hitaði upp áhorfendur með góðum skammti af stjórnarandstöðu og svo mætti Bob á svið í svörtum þröngum galla með flugmannahjálm sem huldi andlit hans.

Bob sýndi snilldartilþrif á gítar og trommur sem hann spilaði á samtímis. Stemningin í salnum fyrir svokallaðri "psychobilly"-tónlist hans var gríðarleg og ekki spillti fyrir hressileg sviðsframkoma og uppákomur eins og Boob Scotch - þegar Bob fékk lánað brjóst til að dýfa í viskíglasið sitt.

Meðal gesta kvöldsins voru leikaraparið Brynhildur Guðjónsdóttir og Atli Rafn Sigurðsson, Magga Stína og eiginmaður hennar Eiríkur Guðmundsson, Frosti Logason og Krummi í Mínus og Ágústa Eva Erlendsdóttir, sjálf Silvía Nótt.