Búið að ganga eins og í sögu

Miðasala er hafin á útgáfutónleika Írafárs sem verða haldnir í Austurbæ á laugardag í tilefni útgáfu nýjustu plötu sveitarinnar. Írafár hefur verið í tónleikaferð um Ísland sem hefur gengið afar vel og hefur verið uppselt á nær alla tónleikana tíu. Allur ágóði af tónleikunum rennur til Einstakra barna, sem er stuðningsfélag fjölskyldna barna með sjaldgæfa og alvarlega sjúkdóma.

Lokahnykkur verkefnisins verða einmitt útgáfutónleikarnir í Austurbæ. "Þetta er búið að ganga eins og í sögu hjá okkur og við erum rosalega þakklát fyrir þann stuðning sem við höfum fengið í þessu verkefni okkar," segir Birgitta Haukdal. "Að búa í rútu í ellefu daga hefur að sjálfsögðu tekið á mannskapinn og fólk var orðið ansi þreytt en það gleymdist allt þegar ein móðir einstaks barns kom baksviðs hjá okkur eftir tónleikana í Keflavík með tárin í augunum og þakkaði okkur fyrir það sem við erum að gera," segir hún.

Fyrir þá sem vilja leggja málstaðnum lið er einnig hægt að leggja inn á söfnunarreikning Íslandstúrs Írafárs á heimasíðu Íslandsbanka, www.isb.is. Miðasala á tónleikunum fer fram í útibúum Íslandsbanka.