Þrír tenórar í veiðihug

Tenórarnir Gunnar Guð­björnsson, Jóhann Friðgeir Valdimarsson og Snorri Wium bjóða upp á létta tónlistarveislu á morgun að hætti stjörnutenóranna þriggja. Þeir vonast til þess að geta með söng sínum laðað fleiri áheyrendur að gnægtabrunni klassískrar tónlistar.

"Já, við erum að veiða fólk," segir Gunnar Guðbjörnsson, einn tenóranna þriggja sem ætla að troða upp í Íslensku óperunni á morgun. "Þetta er vel reynd formúla og hún virðist alveg svínvirka. Þetta virðist ná til fólks sem hefur ekki endilega farið mikið á klassíska tónleika og hefur jafnvel engan áhuga á því, en með því að blanda þessu saman, bæði þessu létta og svo þyngra í bland, þá virðist dæmið ganga upp. Sérstaklega ef maður fléttar inn í það smá húmor og fíflagangi, svo hægt sé að hafa þetta skemmtilega afþreyingu."

Þeir Snorri og Jóhann Friðgeir hafa áður tekið þátt í tónleikahaldi fyrir jólin undir merkjum "tenór­anna þriggja", en þetta er í fyrsta skipti sem Gunnar er með. "Við erum ekkert að reyna að tefla okkur fram sem þeim þremur bestu á Íslandi. Við erum bara þrír tenórar að syngja og það er enginn rígur á milli okkar." Það gerist reyndar ekki oft að þrír tenórar syngi saman á tónleikum, nema við tækifæri sem þessi. Lagavalið er í anda stóru tenóranna þriggja, þeirra Pavarottis, Domingos og Carr­eras. Það þyngsta á dagskránni eru vinsælar óperuaríur, en inn á milli eru bæði íslensk lög, meðal annars syrpa af lögum Sigfúsar Halldórssonar, og svo bandarísk lög eins og Moon River og My Way.

"Og svo byrjum við auðvitað á Hamraborginni, íslenska tenór­laginu," segir Gunnar, sem er sannfærður um mikilvægi þess að halda klassískri tónlist að fólki þótt það sé undir formerkjum léttrar afþreyingar. "Við erum svo sem ekkert að gefa okkur út fyrir það að vera neitt frumlegir, enda er klassískur söngur ekki sérlega frumlegt listform, en við meg­um ekki tapa okkur alveg í raunveruleikaþáttunum og ensku knattspyrnunni, þótt það sé gott út af fyrir sig. Ég er viss um að það er fullt af fólki sem verður himinlifandi yfir því að hafa látið verða af því að koma að hlusta á okkur."