Ilmurinn úr eldhúsinu...

Desember er tími ofgnóttar í mat, drykk, samveru og kærleika. Hvarvetna má skjóta sér inn úr kuldanum og setjast að veisluborði í veitingahúsum landsins. Hér gefur að líta sýnishorn af aðeins fáeinum valkostum þegar kemur að jólahlaðborðum þetta árið. PERLAN

Hvað er í boði: Stærsta og mesta úrval hefðbundinna, íslenskra jólarétta; yfir áttatíu réttir á boðstólum. Sérstaða borðsins eru dádýr og hreindýr meðal aðalrétta. Verð: 4.950 krónur á mánudögum og þriðjudögum, en 5.950 aðra daga. Frítt fyrir börn undir sex ára aldri, en 3.500 krónur fyrir sex til tólf ára. Stemning: Líflegir starfsmanna­hópar um helgar. Fjölskyldur og einstaklingar að gera sér dagamun á virkum dögum. Perlan snýst einn hring á tveimur tímum. Í boði fyrir börnin: Ekkert barna­horn en haft ofan af fyrir börnum með litabókum og litum. Sunnudagar eru einkar vinsælir hjá barnafjölskyldum. Skemmtiatriði: Lifandi dinner­tónlist á föstudags- og laugardags­kvöldum. SKÍÐASKÁLINN Í HVERADÖLUM

Hvað er í boði: Hefðbundið íslenskt jólahlaðborð frá fimmtudegi til sunnudags. Verð: Fimmtudagar krónur 4.990, föstudagar og laugardagar krónur 6.400 og sunnudagar krónur 4.500. Frítt fyrir börn til tólf ára. Stemning: Hátíðleg stemning sem felst ekki síst í umhverfinu og staðnum sjálfum enda jólalegur skíðaskáli í fögrum fjallasal. Starfs­mannahópar og vina­klúbbar í meirihluta um helgar, fjöl­­skyldur á sunnudögum og minni hópar og einstaklingar á fimmtudagskvöldum. Skemmtiatriði: Raggi Bjarna og Þorgeir Ástvaldsson syngja jólalög á fimmtudagskvöldum; hljómsveitin Sælusveitin leikur fyrir dansi föstudags- og laugardagskvöld, en áður býður Ólafur Benedikt Ólafs­son gesti velkomna með harmóníkuleik og söng yfir borðum. Rútuferðir fram og til baka innifaldar í verði á föstudags- og laugardagskvöldum. ARGENTÍNA STEIKHÚS

Hvað er í boði: Amerísk kalkúna­veisla þar sem heill kalkúnn er aðalaðdráttaraflið, auk dýrindis kalkúnarétta, lambafillets, en hvorki hangikjöt né hamborgarhryggur á borðum. Fyrir fólk sem leitar í jólaveislu með amerísku sniði, enda gömul hefð á Argentínu þótt breytilegir réttir séu frá ári til árs. Verð: Krónur 4.900 sunnudaga til miðvikudags. Krónur 5.700 fimmtudaga til laugardags. Ókeypis fyrir börn upp að sex ára aldri. Krónur 1.800 fyrir börn frá sex til tólf ára. Stemning: Lífleg um helgar þegar starfsmenn minni fyrirtækja gera sér glaðan dag á rótgrónu, litlu og yndislegu veitingahúsi. Fjölskyldur í meirihluta á fimmtudögum og sunnudögum. Í boði fyrir börnin: Ekkert barnahorn, en börn innilega velkomin. Skemmtiatriði: Engin. HÓTEL VALHÖLL Á ÞINGVÖLLUM

Hvað er í boði: Íslenskt og þjóðlegt og vel útilátið jólahlaðborð frá fimmtudegi til sunnudags. Hádegishlaðborð á sunnudögum. Verð: Krónur 4.900 í hádeginu á sunnudögum, annars 6.200 krónur. Krónur 1.850 fyrir börn frá fjögurra til tólf ára. Stemning: Róleg, rómantísk og afslöppuð. Þjóðlegur hátíðleiki í bland við fagurt og nýuppgert hótel sem skín af glæsileika. Kerti og luktir lýsa upp umhverfið og áhersla á þjóðgarðinn, hátíðleik og fagra upplifun. Í boði er sérstakur gistipakki fyrir tvo, þar sem jólahlaðborð og morgunmatur er innifalinn. Í boði fyrir börnin: Notalegt sjónvarpshorn með barnaefni, litabækur og fögur náttúra með snjókasti og vetrarfjöri utandyra. Skemmtiatriði: Védís Hervör Árna­dóttir syngur jólalög við undirleik Valdimars Kristjánssonar um helgar. VOX

Hvað er í boði: Hægt er að mæta í hlaðborð með jólaívafi í hádeginu. Þar eru hinir hefðbundnu smáréttir í boði auk svínakjötsins vinsæla. Þar að auki gefst gestum færi á að smakka fleiri eftirrétti en gengur og gerist á venjulegum hlaðborðum. Hins vegar er hægt að fá sér af svokölluðum jólaseðli þar sem herlegheitin hefjast með úrvali smárétta, öli og snafsi. Í forrétt er boðið upp á steiktan humar í kardimommukrydduðu gulrótarkremi. Í aðalrétt er hægt að velja á milli unggríss og villiandar en í eftirrétt er rjómarönd og jólaglögg. Þá má ekki gleyma jóla-brunchi í hádeginu á sunnudögum þar sem gestir geta mætt með börnin sín, gefið þeim að borða og komið þeim síðan í umsjá tveggja leiklistarnema ef þeir vilja fá ró og næði. Verð: Hlaðborðið kostar 3.250 krónur en jólaseðillinn er á 6.500 krónur en hægt er að bæta 3.500 krónum við og fá sérvalin vín með. Stemning: Vox býður hópa velkomna til sín og getur útbúið fasta matseðla sem bornir eru fram í fyrirfram pöntuðum sal. Veitingastaðurinn þykir nokkuð hlýlegur og hentar vel fyrir pör sem vilja gera sér dagamun. Í boði fyrir börnin: Enginn sérstakur matseðill er í boði fyrir börnin en hins vegar er hægt að einfalda allt á matseðlinum þegar þau eru með í för. Leiklistarnemarnir hafa vakið mikla kátínu meðal barnanna á sunnudögum. Skemmtun: Það er lifandi tónlist á barnum, fimmtudaga til sunnu­daga. Á NÆSTU GRÖSUM

Hvað er í boði: Árleg friðarmáltíð, ígildi jólahlaðborðs, helgina 9. til 11. desember. Hnetusteik er í aðalhlutverki með úrvali meðlætis. Tíu ára gömul hefð þar sem gestakokkur er Spessi ljósmyndari. Verð: Krónur 2.200 Stemning: Gríðarleg stemning og hátíðleiki. Í boði fyrir börnin: Barnapitsur. Skemmtun: Blús og djass fyrir matargesti, auk ljóðaupplesturs Sigríðar Jónsdóttur á laugardags­kvöldinu. HÓTEL LOFTLEIÐIR

Hvað er í boði: Ekta danskt jólahlaðborð Idu Davidsen, sem er frægasta smurbrauðsdama Dana­veldis, og Marentzu Poulsen. Árviss hefð í þrettán ár, sem byrjaði á Hótel Borg. Í boði alla daga vikunnar. Verð: Í hádeginu alla daga krónur 3.000; krónur 4.500 mánudags- til fimmtudagskvölds, og krónur 4.800 föstudags- og laugardagskvöld. Frítt fyrir börn yngri en fimm ára. Hálft gjald fyrir börn sex til tólf ára. Stemning: Danskur jólahátíðleiki svífur yfir vötnunum, enda Danir kunnir fyrir að dekra við sig í desember. Ida Davidsen kemur sjálf til landsins til að setja upp jólahlaðborðið, sem er ómissandi viðburður fyrir marga að verða vitni að. Skemmtun: Helga Möller og Magnús Kjartansson sjá um fagra jólatónlist á föstudags- og laugardagskvöldum. Sunnudagana 11. og 18. desember endar hádegis­hlaðborðið á dansi í kringum jólatré þar sem gjöfum til barna er úthlutað. n