Réðst að vopnuðum þjófi og hélt föstum

Maður var barinn þrívegis með hafnaboltakylfu um klukkan átta í gærmorgun á bílastæðinu við Laugardalslaug. Sauma þurfti þrjú spor í andlit hans og er hann hugsanlega nefbrotinn. Var maðurinn á leiðinni að bíl sínum þegar hann sá að innbrotsþjófur var að mölva bílrúðuna og skarst þá bíleigandinn í leikinn.

Innbrotsþjófurinn lamdi hann í andlitið með kylfunni, svo í hnakka og loks í bakið. Bíleigandinn náði að snúa innbrotsþjófinn niður og hélt honum nokkra stund.

Kallaði hann á vegfarendur sem voru þar nokkrir á ferð í nánd en enginn kom honum til hjálpar fyrr en eftir allnokkrar mínútur. Þá komu tveir menn og leystu bíleigandann af við fangabrögðin en hann var farinn að grátbiðja um hjálp enda orðinn þjakaður mjög.

Héldu mennirnir tveir þjófnum meðan annar vegfarandi kallaði á lögregluna, sem var fljót á vettvang.

Innbrotsþjófurinn hafði að sögn lögreglu brotið rúður í tveimur bílum þegar hann var staðinn að verki og unnið töluverðar skemmdir á öðrum þeirra.

Eigandi annarrar þeirra saknar enn fartölvu sem var í bílnum og telur lögreglan hugsanlegt að innbrotsþjófurinn hafi falið hana áður en hann hófst handa við næsta bíl. Að sögn lögreglunnar var maðurinn undir áhrifum vímuefna þegar hann var handtekinn.

Ekki var hægt að yfirheyra hann fyrr en í gærkvöldi og þegar Fréttablaðið fór í prentun var enn ekki búið að ákveða hvort hann yrði úrskurðaður í gæsluvarðhald. "Við erum ofboðslega leið yfir því að fólk sé að slasast hérna fyrir utan hjá okkur," segir Þórunn Auðunsdóttir, kynningarfulltrúi World Class, sem er með líkamsræktarstöð á þessum stað.

"Við höfum sett myndavélar hér fyrir utan en þær duga skammt í þessu myrkri. Við höfum áhuga á því að lýsa upp bílastæðið en það er stórt verkefni og æskilegt væri að við gerðum það í samvinnu við borgina," segir hún.

Hvað áhrærir sein viðbrögð vegfarenda ber að geta þess að þar sem dimmt var þegar atvikið átti sér stað er óvíst hvort þeir hafi áttað sig á því hvað var að gerast.

Eins segir Þórunn að mörg skólabörn fari þarna um á þessum tíma og gætu þau hafa verið á meðal þessara vegfaranda.