Söfnun hafin fyrir Særúnu

Fjáröflun er hafin fyrir Særúnu Sveinsdóttur Williams. Eins og kunnugt er missti Særún neðan af báðum fótum í bílslysi í Nebraska í Bandaríkjunum um miðjan síðasta mánuð. Það eru fyrrum bekkjarfélagar Særúnar úr Öldutúnsskóla sem hafa tekið sig saman og hyggjast koma framlagi til Særúnar fyrir jólin.

„Upphaflega ætluðum við aðeins að hafa þetta okkar á milli en þegar við ræddum þetta við fjölskyldur og vinnufélaga þá kom á daginn að mjög margir vildu taka þátt í þessari söfnun,“ segir Guðfinna Guðmundsdóttir, einn þeirra bekkjarfélaga Særúnar sem standa að söfnuninni.

Enn líður Særún talsverðar kvalir og í gær var fyrirhuguð enn ein aðgerð á henni. Hún segist standa straum af sjúkrakostnaði með tryggingum. Á hinn bóginn sé með öllu óljóst hvernig hún tekst á við að halda uppi þremur börnum og heimili.

Særún er einstæð fimm barna móðir, en tvö barnanna eru uppkomin.

Söfnunarreikningurinn er í Sparisjóði Reykjavíkur með reikningsnúmeri 1150-05-414746 með kennitölu 010560-2689.