Fagrar sellóperlur

"Þetta er ofboðslega falleg tónlist," segir Antonia Hevesi píanóleikaru um nokkrar sellóperlur sem Gunnar Kvaran ætlar að flytja ásamt henni á hádegistónleikum í Hafnarborg á morgun.

"Það er líka svo gaman að spila með Gunnari. Ég hlakka virkilega til." Tónleikarnir hefjast klukkan tólf og standa yfir í um það bil eina klukkustund. Verkin sem þau flytja eru úr ýmsum áttum, bæði frá barokktímabilinu og rómantíska tímabilinu, þar á meðal Svanurinn eftir Saint-Saens og eldfjörug Tarantella eftir W. H. Squire.

"En við ætlum að byrja á Pieces en Concert eftir Couperin, sem er barokksvíta í fimm köflum." Antonia hefur skipulagt hádegistónleika í Hafnarborg, sem haldnir eru einu sinni í mánuði yfir vetrartímann. Hún fær jafnan til sín gest á hverjum tónleikum, ýmist söngvara eða einleikara og aðsóknin hefur jafnan verið mikil.

Aðgangur er ókeypis meðan húsrúm leyfir. Antonia stendur í ströngu þessa vikuna, því auk jólatónleika í Hafnarfjarðarkirkju leikur hún með Hlöðveri Sigurðssyni tenórsöngvara á útgáfutónleikum í Salnum í Kópavogi á sunnudaginn.