Þekkt gáfumenni meðal þátttakenda í Meistaranum

Á annan í jólum byrjar nýr spurningaþáttur á Stöð 2 sem ber heitið Meistarinn. Þar mun Logi Bergman Eiðsson leita logandi ljósi að "gáfaðasta" manni Íslands. Nýverið fóru fram próf á fjórum stöðum um land allt og tóku alls 250 manns þátt þar af 190 á stórhöfuðborgarsvæðinu.

"Það var mikil stemning," segir Logi Bergman þegar hann var spurður hvernig til hefði tekist. "Grunnhugmyndin er að finna hver sé bestur í spurningakeppnum," útskýrir Logi. Meistarinn er ekki format þáttur að erlendri fyrirmynd heldur ramm - íslensk dagskrárgerð.

"Það verður allt gert til að halda spennunni út allan þáttinn," segir Logi sem sjálfur er fullur eftirvæntingar fyrir þættinum. 22 keppendur eru skráðir til leiks í Meistaranum.

Sextán voru valdir úr úrtökuprófunum en sex komu að utan. Samkvæmt heimildum Fréttablaðsins eru margir af þeim þjóðþekktir fyrir kunnáttu sína á spurningasviðinu og má þar nefna Gettu Betur dómaranna Stefán Pálsson og Ólínu Þorvarðardóttur. Alþingismaðurinn og ofurheilinn Mörður Árnason ætlar einnig að mæta til leiks samkvæmt heimildum blaðsins en þegar hefur verið dregið hverjir lenda saman og lofar Logi að engin ætti að vera svikin af fyrstu rimmunni.

Þá upplýsir hann að feðgar hafi komist í gegnum prófin og því gæti allt eins orðið mikil fjölskyldudramatík í þáttunum ef þeir lentu á móti hvor öðrum. Sá sem stendur einn uppi hreppir titilinn Meistarinn og fimm milljónir íslenskra króna.