Damien Rice til Íslands

Írski tónlistarmaðurinn Damien Rice hefur samþykkt að koma fram á tónleikum í Laugardalshöll 7. janúar til eflingar náttúruvernd á Íslandi. Með honum í för verður söngkonan Lisa Hannigan sem hefur sungið mikið með honum í gegnum árin. Áður höfðu stór nöfn á borð við Björk, Damon Albarn, Sigur Rós, Hjálma, Ham, Múm, Egó og Gostigital staðfest komu sína. Hópurinn kallar sig nú Hætta!

"Ég hringdi í hann og spurði hvort hann væri til í þetta og hann sagði bara "auðvitað"," segir Kári Sturluson, góðvinur Damien Rice, sem nýverið stóð fyrir vel heppnuðum tónleikum Sigur Rósar í Höllinni. Að sögn Kára er Rice önnum kafinn um þessar mundir við upptökur á næstu plötu sinni. Þrátt fyrir það ákvað hann að taka sér pásu frá upptökunum í janúar til að spila hér á landi enda ekki á hverjum degi sem slíkt er í boði. Rice sló í gegn fyrir tveimur árum síðan með fyrstu plötu sinni O og var tónlist hans meðal annars notuð í hinni margverðlaunuðu mynd Closer. Hann spilaði hér á landi síðast á Nasa í september í fyrra ásamt Lisu Hannigan við frábærar undirtektir.

Koma hans hingað til lands er mikill fengur fyrir tónlistarunnendur. Með tónleikunum í Höllinni vilja skipuleggjendur og tónlistarmenn beina athyglinni að náttúru Íslands og því að hún sé ekki sjálfsögð uppspretta raforkuvera eða álvera. Miðasala á tónleikana hefst á morgun á midi.is og í verslunum 12 Tóna, Smekkleysu, BT og Skífunnar og í Kaffi Hljómalind. Miðaverð er 3000 krónur í stúku en 2500 í stæði auk miðagjalds.