Kom aldrei hingað vegna Bond - myndarinnar

Enski leikarinn sir Roger Moore er væntanlegur hingað til lands á vegum Barnahjálpar Sameinuðu þjóðanna, UNICEF. Verður leikarinn viðstaddur undirritun styrktarsamnings þriggja fyrirtækja sem vilja leggja sitt af mörkum til að bæta líf barna í þróunarlöndum. Ekki verður afhjúpað hvaða fyrirtæki er um að ræða fyrr en á fundinum en Stefán Ingi Stefánsson, framkvæmdastjóri UNICEF á Íslandi, sagði verkefnið vera eitt það stærsta sem samtökin hér á landi hefðu tekið þátt í.

Hið mikla umfang verkefnisins er meðal annars ástæða þess að við gátum fengið sir Roger Moore til að koma. Moore er annar velgjörðarsendiherra UNICEF sem kemur til landsins á tiltölulega skömmum tíma en í fyrra heimsótti Harry Belafonte landið heim. Moore var fyrir tveimur vikum staddur á Indlandi en hann þykir mjög reyndur á sínu sviði. Það að svona nafntogaðir einstaklingar eins og hann leggi málstaðnum lið nýtist samtökunum mjög vel, segir Stefán Ingi en hann telur það mjög mikilvægt þegar fólk sem kann að koma fyrir sig orði deilir reynslu sinni með öðrum líkt og Moore gerir.

Þótt ótrúlegt megi virðast er þetta í fyrsta skipti sem Roger Moore kemur til Íslands. Reyndar renndi þekktasta persóna hans, leyniþjónustumaðurinn James Bond, sér á skíðum við Jökulsárlón í kvikmyndinni A View to a Kill. Fróðir menn hafa tjáð mér að Moore hafi aldrei komið hingað í tengslum við þær tökur, útskýrir Stefán en líst vel á þá hugmynd að sýna leikaranum hvar hann slapp undan óþokkunum í myndinni frægu.