Koma jólabjórsins er karnival Dana

Nú er tími jólabjórsins upprunninn og íslenskir sem erlendir bjórframleiðendur að stilla fram jólaöli ársins. Í Danmörku er rótgróin hefð fyrir jólabjór og mikið um dýrðir honum tengt. Rithöfundurinn Jón Kalman Stefánsson bjó þrjú ár í Danaveldi og kynntist þeirri stemningu vel.

"Þá kynntist ég þessari hátíð sem Danir kunna að búa til í kringum jólabjórinn. Maður fór út í búð snemma morguns og þá var búið að koma upp borði og hella jólabjór til hálfs í glösin. Síðan fóru Danir að slæðast kátir inn í búðina til að smjatta á bjórnum og velta fyrir sér hvort hann væri betri í ár en árið áður og rifja upp minningar frá því í fyrra. Þessi stemning hreif mig mjög og ég sá strax að þetta snerist um eitthvað allt annað og meira en það eitt að drekka bjór," segir Jón Kalman, sem nú teflir fram skáldsögunni Sumarljós, og svo kemur nóttin.

"Fyrir Dani eru allir dagar eins þegar kemur að bjór og því er þessi hátíð ekki endilega stíluð inn á helgi. Þetta var kannski á miðvikudagsmorgni og ekki verið að hella í neinar fingurbjargir heldur stór glös. Þótt Danir fyndu ekki á sér ranglaði Íslendingurinn út eftir smakkið og keypti náttúrlega helmingi meira en annars í búðinni," segir Jón Kalman hlæjandi, en af dönskum jólabjór hefur hann mest dálæti á Tuborg.

"Stemmingin nær hámarki þegar grænt ljós er sett á dreifingu jólabjórsins og tankbílar keyra frá verksmiðjunum til að dreifa húfum, merkjum og öðrum varningi tengdum bjórnum meðal fólksins. Þessu fylgir heilmikil tilhlökkun hjá Dönum, þetta er þeirra karnival og margir sem vakna sérstaklega til að fá sér bjór," segir Jón Kalman sem sjálfur sér til þess að eiga smávegis af dönskum og líka íslenskum jólabjór til samanburðar á aðventunni.

"Íslenski jólabjórinn er fyrirtak en hefur ekki hitt mig í hjartastað eins og sá danski, sem ég er nú tilfinningalega bundinn, eða öllu heldur stemningunni í kringum hann. Danir eru sérfræðingar í að búa til hátíð í kringum það sem þeir framleiða og gera að miklu meira en öli eða varningi."