Í leit að galdri óperunnar

"Hugmyndin er fyrst og fremst sú að Íslenska óperan standi fyrir því að það sé heitt á könnunnni, að það sé alltaf heitt í þessari deiglu," segir Bjarni Daníelsson, óperustjóri Íslensku óperunnar. Í dag býður Íslenska óperan öllum sem áhuga hafa til fyrstu samkomu Óperudeiglunnar, sem á að verða vettvangur fyrir tilraunastarf og nýsköpun á sviði óperulistar.

"Óperan hefur óneitanlega dregist svolítið aftur úr þegar kvikmyndirnar og söngleikirnir tóku á rás, en hún er samt þessi fjöltæknigaldur sem menn njóta í miklu návígi. Þess vegna trúi ég því að þetta form, óperan, eigi erindi til margra og hún eigi að geta náð aftur þessari nánast poppstöðu sem óperan hafði á klassíska tímanum."

Efni fundarins verður kynning á Óperudeiglunni og umræður um áherslur og leiðir í framkvæmd verkefnisins. Vonir standa til þess að tónskáld sem vilja semja óperur muni taka þátt í deiglunni, sömuleiðis ýmsir sem hafa sérþekkingu á leikhúsi og skyldum listgreinum og allir sem hafa brennandi áhuga á óeruforminu.

"Þarna gætu komið allir sem hafa eitthvað til málanna að leggja um það hvernig óperan geti höfðað til margra án þess að slegið sé af listrænum kröfum. Það er sama hvaðan gott kemur. En þó verður að gera ráð fyrir því að þegar kemur að harðsvíraðri úrvinnslu þá sé það fyrst og fremst fagfólk á þessu sviði sem leiði vinnuna."

Óperudeiglunni er ætlað að vera tvennt í senn: Annars vegar opinn vettvangur til umfjöllunar og skoðanaskipta um óperusmíði. Hins vegar skipulegt vinnuferli hópa einstaklinga með ólíka sérþekkingu sem vilja gera tilraunir með óperuformið í þeim tilgangi að skapa ný verk sem höfða til margra. Haldnir verða opna málfundir og starfsfundir um óperulist þar sem jafnframt er fjallað á gagnrýninn hátt um verk tilraunahópanna.

"Í sjálfu sér er gert ráð fyrir þremur aðaláföngum. Sá fyrsti snýst nú eiginlega bara um að róta upp hugmyndum og koma á þær svolítilli mynd. Síðan er meiningin að velja úr þeim hugmyndum einhvern fjölda til áframhaldandi úrvinnslu, og svo er þriðji áfangi þegar aftur verður valið og jafnvel unnið úr því fullburða verk."

Hugmyndin er þó ekki sú að þetta verði línulegt ferli sem eigi að leiða beint að stórvirkjum, heldur er meiningin að þegar fyrsta áfanga er lokið verði hann strax endurtekinn. Sama verður gert með annan áfanga. "Þetta verður því eins og heit deigla í potti. Síðan getur hver sem vill vinna með þær hugmyndir eða með því fólki sem er þarna komið og hellt úr þessari deiglu í eitthvert mót."