Skuggabörn og Októberfest

Skuggabörnin, bók Reynis Traustasonarblaðamanns, kemur út á morgun, föstudag. Í bókinni segir Reynir frá ransóknarleiðangri sínum um undirheima Reykjavíkur.

Að kvöldi útgáfudagsins verður svo heimildarmyndin Skuggabörn frumsýnd í Regnboganum en þeir Lýður Árnason og Þórhallur Gunnarsson fylgdu Reyni eftir á undirheimaflakki sínu með kvikmyndatökuvélar og festu ævintýri höfundarins á filmu. Myndin mun án efa ekki síður vekja athygli og umtal en sjálf bókin en eftir að tökum lauk blönduðust tveir viðmælenda Reynis inn í skelfilegan eiturlyfjaharmleik þar sem annar þeirra varð hinum að bana.

Það blandast fáum hugur um að alheimsfrumsýningin á hryllingsmyndinni Hostel á Októberbíófest á laugardaginn er meiriháttar viðburður. Leikstjórinn Eli Roth situr nú sveittur við að klára myndina í Los Angeles og kemur með sýningareintakið í handfarangri sínum til landsins á föstudaginn en með honum í för verður vinur hans Quentin Tarantino. Hostel verður jafnvel ekki frumsýnd fyrr en í byrjun næsta árs þannig að Íslandsvinátta leikstjórans er heldur betur að gefa landsmönnum forskot á sæluna.

Búist er við nokkrum fjölda erlendra kvikmyndablaðamanna til landsins í tilefni sýningarinnar og framleiðendur myndarinnar hafa töluverðar áhyggjur af því að óprúttnir aðilar muni reyna að taka myndina upp og dreifa henni á netið löngu fyrir frumsýningu. Það verður því mikil öryggisgæsla á öllum sýningum myndarinnar um næstu helgi.

Framleiðendur hennar og dreifingaraðilar, Sony og Lion's Gate, ætla ekki að taka neina sénsa og líkt og á stórum kvikmyndahátíðum í útlöndum verður sjérþjálfaður mannskapur á staðnum með tól og tæki í sölunum til að finna og koma í veg fyrir allar ólöglegar upptökur. Öryggisverðirnir verða þó ekki fluttir inn og síðustu daga hafa Íslendingar fengið þjálfun í því að þefa uppi bíósjóræningja. Það er þó ekki útilokað að einn sérfræðingur verði í för með aðstandendum myndatinnar sem koma hingað á morgun. Hans hlutverk verður þá fyrst og fremst að fara yfir stöðuna og tryggja að salurinn sé "öruggur" eins og þeir segja í bransanum.