Töff að vera í skákklúbbi

Það þykir ekki lengur "nördalegt" að vera í skákfélagi ef marka má þær undirtektir sem skákfélag í Háskóla Reykjavíkur hefur fengið.

Forsagan er sú að átta nemendur í skólanum áttu að vera læra undir próf síðasta vor en freistuðust í tölvur þar sem þeir fóru að tefla á netinu. Upp úr þessu uppátæki varð til félagsskapur sem nefndur er eftir brjóstsykrinum fræga, Fischerman's Friend og skáksnillinginum fræga, Bobby Fischer.

"Þetta er eiginlega brandari sem verður bara verri og verri," segir formaður félagsins, Gunnar Egilson. Hann upplýsir að félaginu hafi á þessari önn vaxið ásmegin og nú sé búið að stofna Skákíþróttafélag Stúdenta við Háskólann í Reykjavík.

"Það má því kannski segja að starfseminni sé skipt í tvo hluta. Annars vegar Fischerman's Friend sem teflir annan hvern fimmtudag á "léttu nótunum" og svo er það Skákíþróttafélagið sem var stofnað til alvarlegri hluta," útskýrir Gunnar en tekur þó fram að íþróttafélagið hafi ekki enn formlega hafið störf.

"Við höfum í hyggju að standa fyrir fjöltefli í samstarfi við Hrókinn til að leggja forseta félagsins,Hrafni Jökulssyni, lið í að safna fyrir skákborðum sem eiga að fara til Grænlands," segir formaðurinn. Þá bætir hann ennfremur við að verið sé að leggja drög að háskólamóti í skák. Sjálfur segist Gunnar vera arfaslakur í skák og sama gildi um aðra sex stofnfélaga.

"Áttundi maðurinn í hópnum er hálfgerð ráðgáta en hann varð Ísaksskólameistari sex ára og hætti á toppnum," útskýrir hann og tekur fram að einu skilyrðin til að komast í hópinn sé að vera nemandi í skólanum. "Háskólinn í Reykjavík hefur sýnt, ólíkt öðrum skólum erlendis, að það er töff að vera í skákklúbbi."