Fræga fólkið, fasanar og ilmvötn

Söngkonan Madonna ætlar að hætta að skjóta fasana í nágrenni við heimili sitt á Englandi. Ástæðan er sú að hún fylltist mikilli sektarkennd eftir að hafa skotið sinn fyrsta fugl. Var hann ekki dauður þegar hann féll til jarðar og átti í miklu dauðastríði beint fyrir framan nefið á henni.

Leikkonan Gwenyth Paltrow hefur tekið við af Elizabeth Hurley sem andlit ilmvatnsins Estee Lauder. Hurley, sem er fertug, hefur verið andlit ilmvatnsins síðastliðin tíu ár og mun halda áfram að vera talsmaður þess.

Hjartaknúsarinn George Clooney lét öryggisvörð við kvikmyndahús í London fá það óþvegið við frumsýningu myndarinnar Good Night. Eftir sýninguna ætlaði Clooney og fyrrverandi kærasta hans Lisa Snowdon að yfirgefa staðinn bakdyramegin og stíga upp í bíl sem átti að bíða þeirra en bíllinn kom alltof seint. Á meðan öskraði Clooney á öryggisvörðinn og hótaði að rjúka í hann.

Orðrómur er uppi um að Brad Pitt og Angelina Jolie ætli að ganga í hjónaband þann 1. desember. Talið er að George Clooney, vinur Pitts, ætli að lána þeim húsið sitt á Ítalíu fyrir athöfnina.

Leikstjórinn Oliver Stone lofar því að í væntanlegri mynd hans um hryðjuverkaárasirnar á Bandaríkin þann 11. september verði borin virðing fyrir fórnarlömbum árásanna. Myndin, sem skartar Nicolas Cage í aðalhlutverki, segir sögu tveggja lögreglumanna sem var bjargað úr rústum tvíbura­­turnanna 22 klukkutímum eftir að þeir hrundu. Í kvikmyndinni verða m.a. notaðar alvöru myndir sem voru sýndar í fréttatímum bandaríska sjónvarpsins.

Leikstjórinn Steven Spielberg hefur lofað því að nýjasta mynd sín, Munic, komi í kvikmyndahús í næsta mánuði. Er hann í miklu kapphlaupi við að ná að klára myndina svo hún geti tekið þátt í næstu óskarsverðlaunahátíð. Myndin fjallar um ólympíu­leikana í Munchen árið 1972 þegar palestínskir hryðjuverkamenn rændu hópi ísraelskra keppenda.