Fagottkonsert í tilefni af afmæli Seltjarnarness

Sinfóníuhljómsveit Íslands efnir til afmælistónleika í Háskólabíói í kvöld í tilefni af 125 ára afmæli Seltjarnarnesbæjar. Fjöldi listamanna kemur fram á tónleikunum, þar á meðal Rúnar Vilbergsson sem leikur fagottkonsert eftir Vivaldi. Rúnar er reyndur fagottleikari.

Auk þess að hafa blásið með Hinum íslenska þursaflokki um árabil hefur hann m.a. leikið með hljómsveit Íslensku óperunnar og Kammersveit Reykjavíkur. "Þetta er mjög skemmtilegt verk, bæði vel skrifað og áheyrilegt," segir Rúnar um konsertinn í kvöld. "Hann [Vivaldi] var í Feneyjum í skóla munaðarlausra stúlkna þar sem hann kenndi. Það er talið að hann hafi skrifað verkið fyrir þær. Því hefur verið haldið fram að þarna í skólanum hafi verið dætur auðmanna sem voru fæddar utan hjónabands og því sjálfsagt einhverjir peningar í spilinu fyrir Vivaldi," segir hann.

Aðspurður segist Rúnar hafa byrjað að læra á fagott um 1971. "Það var eiginlega fyrir tilviljun. Ég var að vinna með manni á trésmíðaverkstæði og hann vildi kenna mér á hljóðfæri. Hann kenndi mér á víólu en síðan þegar það vantaði fagott í skólahljómveitina var ég til í að prófa það." Rúnar spilar ennþá af og til með Þursaflokknum og segir það alltaf jafngaman. "Það er alltaf gaman að vera í popphljómsveit. Við höfum komið saman nokkrum sinnum undanfarin ár þannig að hann hefur ekki verið formlega lagður niður. Það er allt önnur aðkoma þegar maður er í svona hljómsveit. Maður er í allt öðrum gír," segir Rúnar.

Á tónleikunum í kvöld koma einnig fram þau Davíð Ólafsson, Eyjólfur Eyjólfsson, Sesselja Kristjándóttir og Þóra Einarsdóttir sem syngja Messu í D-dúr eftir Dvorák. Selkórinn, undir stjórn Jóns Karls Einarssonar, tekur einnig þátt í flutningnum. Kórinn hefur fengið mikinn liðsstyrk fyrir tónleikana og telur nú hartnær níutíu söngvara.