Meira að gera eftir rannsókn

"Við höfum fengið ný viðskipti frá því að málið kom upp og höfum enga viðskiptavini misst þannig að málið hefur ekki haft tiltakanleg áhrif á reksturinn," segir Jóhannes B. Skúlason, framkvæmdastjóri Skúlason ehf. Húsleit var gerð í húsakynum fyrirtækisins í byrjun mánaðarins að frumkvæði breskrar efnahagsbrotalögreglu í tengslum við meintar blekkingar í viðskiptum og peningaþvætti.

"Það er allt of snemmt að segja til um hvort við höfum undir höndum næg sönnunargögn til þess að leggja fram ákærur," segir David Jones, upplýsingafulltrúi hjá bresku efnahagsbrotalögreglunni. "Við höfum ekki enn getað ákveðið hvenær eða hvernig við munum reyna að ljúka málinu, enda virkar það ekki þannig í hlutfallslega stórum málum sem þessum," segir Jones. Hann segir rannsóknarlögreglumenn vera upptekna við að fara yfir þau gögn sem safnað var.

Jóhannes segist hafa talað við bresku lögreglumennina fyrir viku síðan. "Þeir sögðu mér að rannsóknin gæti tekið allt upp undir tvö ár," segir Jóhannes. Hann hefur fengið þau gögn til baka sem tekin voru við húsleitina.