Umtalsverð hækkun á fasteignaverði

Fasteignamat ríkisins hefur birt í fyrsta sinn tölur um þróun íbúðaverðs eftir borgarhlutum á höfuðborgarsvæðinu með ársfjórðungstíðni. Framvegis munu tölur af þessu tagi birtast ársfjórðungslega. Tölurnar taka til íbúðaverðs í fjölbýli og sýna þróun einfalds meðaltals staðgreiðsluverðs á fermetra. Breytingar á stærð, aldri o.fl. milli tímabila geta skýrt breytingar á fermetraverði Milli fyrsta ársfjórðungs 2004 og fyrsta ársfjórðungs 2005 er hækkunin mest 33,2 prósent á svæðinu innan Hringbrautar sem er svæðið milli Hringbrautar að sunnan og Snorrabrautar að austan. Á fjórum svæðum er hækkunin milli ára meiri en 30 prósent: á áðurnefndu svæði, í Laugarnesinu, Vogunum og á svæðinu Norðurmýri, Holt, Hlíðar norðan Miklubrautar og Múlar. Minnst er verðhækkunin milli ára í Mosfellsbæ (21,1 prósent), Garðabæ (21,8 prósent) og á Seltjarnarnesi (23,5 prósent). Tölurnar má finna á heimasíðu Fasteignamats Ríkisins, www.fmr.is.